Categories
Shëndeti

Nëse do të humbësh ca kile, kjo është receta ideale e mëngjesit

Është vakti më i rëndësishëm i ditës dhe shumë dietologë thonë se është edhe vakti që braktiset më tepër. Por të braktisësh mëngjesin nëse do të biesh nga pesha është vendimi më i gabuar që mund të marrësh. Metabolizmi ka nevojë për të djegur yndyrën dhe për të ushqyer muskujt dhe një ditë e mirë dhe e shëndetshme duhet të nisë me një mëngjes të shëndetshëm. Këtu janë disa arsye pse duhet ta nisësh mëngjesin me tërshërë.

Të mban të ngopur – Sipas një studimi nga Kolegji Amerikan i Nutricionistëve, tërshëra ishte e para në grupin e drithërave që krijonin një gjendje të ngopuri. Të gjithë njerëzit që hëngrën tërshërë në mëngjes ishin më pak të uritur se pjesa tjetër që hëngrën drithëra të tjera. Të dyja grupet kishin një mëngjes me 363 kalori, por grupi që hëngri tërshërë e shtynë më vonë vaktin e drekës, meqë nuk kishin uri.

Përmban më pak sheqer – Në krahasim me të gjitha drithërat, tërshëra ka një përmbajtje më të ulët të sheqerit. Megjithatë, tërshëra bëhet shumë e shijshme duke i shtuar kos dhe fruta për ta bërë mëngjesin edhe më të shëndetshëm dhe me përmbajtje sheqeri të ulët.

Është e pasur me fibra – Një dietë e pasur me fibra mund të të ndihmojë të biesh nga pesha, sepse të mban në gjendje të ngopur. Vetëm një gjysmë filxhani me tërshërë përmban katër gram fibra. Pra, një sasi e mjaftueshme që të mos të ndiesh uri deri në drekë.

Është një ushqim me pak kalori – Tërshëra është e njohur si një ushqim që ka pak kalori dhe yndyra. Mjafton vetëm një gjysmë filxhani çaji, i cili përmban 150 kalori dhe 3 gram yndyrë. Prandaj, edhe veten do ta ndiesh më të lehtë nëse çdo ditë e nis me tërshërë.

Është e pasur me proteina – Duke e përzier tërshërën me qumësht çdo mëngjes, mund t’i shtosh proteinat vaktit. Proteinat, janë një pjesë vitale nëse do të humbasësh peshë, sepse ato të ndihmojnë të ndihesh gjithmonë e ngopur.

Ndihmon diebetikët – Nëse do të biesh nga pesha, por ke ndjeshmëri të lartë ndaj glukozës, tërshëra është zgjedhja e duhur për dietën. Studimet thonë se njerëzit që vuajnë nga diabeti mund të hanë pa frikë tërshërë dhe të ndihen edhe më të shëndetshëm pa pasur probleme.

Të jep energji – Kjo është një ndër arsyet themelore pse njerëzit janë të dashuruar me tërshërën dhe e konsumojnë atë sidomos në mëngjes. E pasur me proteina dhe fibra, një mëngjes me tërshërë do të të japë të gjithë energjinë që do të të duhet përgjatë gjithë ditës.

Forcon sistemin imunitar – Nëse je e ndjeshme ndaj ndryshimeve të temperaturave, është e thjeshtë të ndërpresësh aktivitetin fizik dhe të fillosh të hash ushqime të pashëndetshme. Për fat të mirë, tërshëra përmban beta-gluten, mjaft i rëndësishëm për të forcuar sistemin imunitar, duke ndikuar në përmirësimin e shëndetit.

Ndihmon zemrën – Ushtrimet janë një pjesë shumë e rëndësishme nëse do të humbasësh peshë dhe është mirë që të ushtrohesh vazhdimisht nëse do një zemër të shëndetshme. Po ashtu, duke i shtuar dietës edhe tërshërën, mund të jesh e sigurt që zemra do të jetë e shëndetshme dhe në gjendje të mirë për të përballuar çdo lloj aktiviteti fizik. Sipas një studimi nga Universiteti i Harvardit, meshkujt që konsumojnë çdo ditë një tas me drithëra janë 29 për qind më pak të rrezikuar nga ataku kardiak.

Është e shijshme – Nëse je duke ndjekur një dietë dhe do të humbasësh kile, është shumë e rëndësishme të konsumosh ushqime të shijshme, përveç se të shëndetshme. Kjo do të të ndihmojë të jesh në rrugën e duhur për të humbur kile, si dhe ta shijosh çdo gjë që ha. Nuk ka rëndësi çfarë thonë të tjerët për tërshërën. Ajo është e shijshme.

Categories
Shëndeti

Nëse vuani nga anemia, këto janë ushqimet që ju vijnë në ndihmë

Mishi i kuq: Si ai i viçit dhe derrit, përmbajnë sasi të madhe hekuri heme, që përthithet më lehtë nga trupi se sa hekuri non-heme që përmbajnë bimët. Mëlçia është organi më i pasur në hekur dhe vitamina B. Mëlçia e vicit ka më shumë se 600% të nevojës ditore në hekur dhe vitaminë B-12.

Bimët bishtajore: fasulja, thjerrëzat (lentilet), bizelet. Por kini kujdes se bishtajoret kanë acid fitik që bllokon përthithjen e hekurit, prandaj këshillohet që ato të lihen në ujë gjithë natën para se të gatuhen.

Drithërat integrale: Buka e prodhuar me drithë integrale është burim i mirë hekuri non-heme, lloj hekuri që i duhet trupit në rast mungese të hekurit. Por me gjithë përmbajtjen e lartë në hekur, edhe drithërat përmbajnë acid fitik.

Prandaj këshillohet që bukën ta prodhoni vetë ose ta blini në një furrë ku buka prodhohet pasi është bërë fermentimi i brumit. Kjo është arsyeja kryesore përse njerëzit sot kanë probleme me drithërat. Një fetë bukë përmban 6% të kërkesës ditore për hekur.

Veza është e pasur në lëndë ushqimore:1 vezë e madhe përmban 1 mg hekur, dmth, 7% të nevojës ditore për hekur për femrat dhe 11% për meshkujt.

Vezët ndihmojnë edhe për forcimin e kockave dhe ndërtimin e kyçeve. Gjalpi i kikirikut është burim i mirë hekuri: Dy lugë gjelle gjalpë kikiriku përmbajnë 0.6 mg hekur.

Categories
Shëndeti

Pse vaji i palmës konsiderohet një problem për shëndetin?

Kur bëhet fjalë për problemet e zemrës, kolesterina e lartë mund të jetë një nga kërcënimet më të mëdha. Kjo është për shkak se kur nivelet e kolesterinës rriten shumë, trupi zhvillon depozita yndyrore që mund të bllokojnë rrjedhën e gjakut në enët e gjakut. Qendrat për Kontrollin e Sëmundjeve thotë se arteriet e bllokuara mund të rrisin ndjeshëm rrezikun për sëmundje të zemrës dhe goditje në tru, dy nga shkaktarë kryesor të vdekjeve në Shtetet e Bashkuara.

Kjo çështje serioze nuk është e pazakontë. Mes viteve 2015 dhe 2018, rreth 12 për qind e amerikanëve mbi moshën 20-vjeçare kishin nivele të larta të kolesterinës së keqe e njohur ndryshe si LDL, dhe nivele të ulëta të kolesterinës së mirë apo HDL. Kjo mund të jetë për shkak të një sërë faktorësh si dieta e varfër, mungesa e stërvitjes ose konsumimi i tepërt i alkoolit dhe pirja e duhanit.

Ndërsa të gjithë këta faktorë mund të kontribuojnë në rritjen e niveleve të kolesterinës, ne mund të përqendrohemi në atë që mund të bëjë ndryshime të vogla, e që është dieta juaj. Për shembull, edhe ndryshimi i llojit të vajit me të cilin gatuani është zbuluar se ndihmon në menaxhimin e niveleve të kolesterinës.

Sipas një studimi të publikuar në gazetën “The Journal of Nutrition”, vaji i palmës është prej vajrave më të dëmshme për njeriun sepse përmban shumë yndyra të ngopura. Sipas këtij hulumtimi, krahasuar me krahasuar me vajrat vegjetale më të ulëta në yndyra të ngopura, konsumimi i vajit të palmës rrit ndjeshëm nivelet e kolesterinës së keqe.

Po ashtu, yndyrat e ngopura që gjenden në vajin e palmës, vajin e kokosit, mishin e kuq, gjalpin dhe shumicën e akulloreve, janë të dëmshme për shëndetin tuaj të përgjithshëm dhe duhet të konsumohen gjithmonë me kujdes të shtuar. Dhe ndërsa teknikisht nuk janë aq të këqija sa yndyra trans, sërish është vërtetuar se rrisin nivelet e kolesterinë në gjak.

Zëvendësimi i vajit të palmës me yndyrë të pangopur mund t’ju ndihmojë të zvogëloni rrezikun e kolesterinë së lartë. Studiuesit zbuluan se vajrat e farave si vaji i lulediellit apo farave të lirit, janë më të mirat për uljen e niveleve të kolesterinës.

Pavarësisht nëse luftoni me kolesterinën aktualisht ose keni zbuluar se jeni në rrezik të lartë, zgjedhja e vajit me të cilin gatuani ose konsumoni rregullisht mund të bëjë një ndryshim të rëndësishëm në shëndetin e zemrës suaj. Nëse mundeni, provoni të zëvendësoni vajin ose gjalpin e palmës me vajra të farave, lulediellit ose ullirit.

Categories
Shëndeti

Studimi i vitit 2021: Pse kivi duhet ngrënë me gjithë lëkurë

Shumica e frutave duhet të qërohen përpara se të konsumohen, por ka disa fruta që mjafton t’i lani dhe mund t’i hani me gjithë lëkurë. Mund t’ju vijnë ndër mend fruta si molla, pjeshka apo rrushi, por do të habiteni kur të mësoni se në këtë list përfshihet dhe kivi.

Studimet e kohëve të fundit nga Nottingham University dhe Zespri International, kanë treguar se lëkura e kivit duhet ngrënë pasi na siguron më shumë vitamina dhe vlera ushqyese sesa vetë tuli.

Lëkura e ashpër është problemi dhe arsyeja kryesore pse njerëzit e qërojnë këtë frut, por shkencëtarët pohojnë se ka disa mënyra si të pastroni pushin e lëkurës së kivit dhe më pas të përfitoni prej saj.

Cilat janë përfitimet e të ngrënit kivi me gjithë lëkurë? Kaliumi që gjendet me shumicë te lëkura e kivit mund të rregullojë nivelin e hormoneve, presionin e gjakut dhe funksionin e enëve të gjakut.

Kivi dhe lëkura e tij janë të pasur me antioksidantë të fuqishëm dhe flavonoide të cilat janë substanca kimike me veti anti-alergjike, anti-kancer dhe anti-inflamatore.

Lëkura e kivit mund të përmirësojë shëndetin kardiovaskular dhe është e pasur me vitamina A, C dhe E Nëse ju duket e pamundur të hani lëkurën e kivit, mënyra më e mirë është që frutin ta shtrydhni me lëkurë. Epo nuk ju mbetet më asgjë tjetër veçse ta provoni një herë.

Categories
Shëndeti

Duhet për shikimin dhe imunitetin: Si ta merrni vitaminën A për vete dhe për foshnjen tuaj

Rritja e ngadaltë është një nga shenjat që duhet t’i kushtojmë vëmendje, sidomos te foshnjat dhe fëmijët. Është e rëndësishme të konsumoni vitaminën A nga muaji i tretë i shtatzënisë dhe t’i jepni fëmijës gjatë viteve të para të jetës.

Vitamina A besoj se e dini që është përgjegjëse për zhvillimin e shikimit dhe sistemit imunitar të fëmijës, si dhe rritjen e trupit të fëmijës dhe ndryshimet fizike të nënës.

Ku e gjejmë vitaminën A? E pamë më lart se sa nevojë ka organizmi ynë për këtë vitaminë për të pasur një shëndet të mirë. Trupi nuk ka aftësinë ta sintetizojë vetë dhe për këtë është e nevojshme të merret me ushqimet.

E gjejmë në dy forma të ndryshme: vitaminë A e paraformuar dhe provitamina A. Vitamina A e paraformuar Ajo është e pranishme tek ushqimet me origjinë shtazore.

Është e përthithshme dhe magazinohet lehtësisht, trupi e hidrolizon dhe e kthen në retinol. Gjendet tek mëlçia e gjedhit Vaji i mëlçisë së merlucit, veza (e verdha), gjalpë dhe qumësht i plotë, disa peshq si sardelja, toni, salmoni, skumbria etj.

Nëse keni pyetje apo sugjerime për këtë temë interesante mbi shëndetin, mirëpres komentet ose mesazhet tuaja në dy faqet e mia zyrtare në rrjetet sociale Instagram dhe Facebook me emrin Anila Kalleshi.

Categories
Shëndeti

Cila është arsyeja numër 1 që na nevojitet hudhra e zezë?

Hudhra është një nga antibiotikët më të mirë natyralë që i vjen në ndihmë njeriut. Ajo është e pasur me antioksidantë të cilët e bëjnë atë të mirë kundër kancerit, diabetit dhe inflamacionit.

Hudhra e zezë nga ana tjetër përmban dyfishin e antioksidantëve. Hudhra nxihet nëpërmjet një proçesi fermentimi, një teknikë që aplikohet prej mijëra vitesh.

Duke qenë se ajo përmban sheqerna dhe amino acide gjatë proçesit të fermentimit, këto elementë prodhojnë melanoidinën, një substancë me ngjyrë të zezë që është përgjegjëse për nxirjen e hudhrës. Zakonisht, fermentimi i hudhrës ndodh në një proçes të kontrolluar që shija dhe përmbajtja e saj të ruajnë vlerat.

Shija e hudhrës së zezë është më e ëmbël ndërsa përmbajtja e saj bëhet xhelatinoze. Studimet thonë se konsumi i hudhrës së zezë krahas kryerjes së aktivitetit fizik mund të ndihmojë në pakësimin e depozitave dhjamore, pastrimin e mëlçisë dhe kundër mbipeshës. Megjithatë, konsumi i hudhrës së zezë ofron tre përfitime kryesore shumë të rëndësishme.

Përmirëson shëndetin e zemrës – Hudhra e zezë përmirëson qarkullimin e gjakut, funksionet kardiake dhe shmang shumë sëmundje. Kjo aftësi i atribuohet faktit që hudhra e zezë përmban pesë herë më shumë polifenolë në krahasim me hudhrën e bardhë. Kjo e bën më efikase për të shmangur dëmet e shkaktuara prej radikaleve të lira.

I bën mirë trurit – Prania e lartë e antioksidantëve tek hudhra e zezë e bën atë një aleate të shëndetit të trurit dhe kujtesës. Antioksidantët pakësojnë dëmin e shkaktuar prej radikaleve të lira dhe stresit oksidues e kësisoj e mbrojnë trurin nga rreziku i shfaqjes së sëmundjes së Alzheimerit. Për më tepër, substancat përbërëse të hudhrës së zezë e mbrojnë trurin nga degjenerimi i aftësive të të nxënit.

Categories
Shëndeti

Nëse e gjen dot, ky është fruti perfekt që ndihmon për mbrojtjen e syve

Shkaku kryesor i humbjes së shikimit me kalimin e vjetëve është degjenerimi makular i lidhur me moshën, i njohur ndryshe me shkurtesën AMD. Sëmundja është e shmangshme dhe një studim i fundit i publikuar në revistën “Nutrients” sugjeron se superushqimi i popullarizuar që janë manaferrat goji, mund të jenë një mjet i fuqishëm parandalues.

Studiuesit u kërkuan 13 njerëzve të shëndetshëm të moshës 45 deri në 65 vjeç, që të konsumonin rreth 30 gram kokrra goji të thata, pesë herë në javë për tre muaj rresht, ndërsa 14 pjesëmarrës të tjerë konsumuan suplemente artificiale për shëndetin e syve gjatë të njëjtës periudhë kohore.

Duke krahasuar densitetin e pigmenteve mbrojtëse në sytë e tyre para dhe pas periudhës kohore të studimit, ata gjetën ndryshime të dobishme vetëm në grupin e konsumuesve të manaferrave goji, ndërsa grupi i cili përdori suplemente shtesë nuk tregoi asnjë përmirësim.

Besohet se përmirësimi i shëndetit të syve erdhi nga si pasojë e dy përbërësve që gjenden tek manaferrat goji në sasi të lartë, luteina dhe zeaksantina. Ato janë të njohura për përmirësimin e sëmundjeve të syrit që lidhen me degjenerimi makular.

Një nga përfitimet e manaferrave goji të thata është se nevojitet një sasi shumë e vogël e tyre për të bërë një ndryshim. Kjo do të thotë se zakonisht absorbohen mirë në sistemin tretës, në mënyrë që trupi t’i përdorë ato.

Luteina dhe zeaksantina zakonisht kombinohen në disa ushqime dhe burimet më të mira janë: të verdhat e vezëve, misri, specat portokalli, spinaqi, kungull i njomë dhe disa lloje tjera kungujsh.

Pavarësisht se çfarë zgjidhni, është e rëndësishme që ndërsa plakeni, të përqendroheni në mbrojtjen e syve tuaj ndërsa me anë të ushqimit të mirë. Në fazat e hershme, degjenerimi makular zakonisht nuk ka simptoma, kështu që kujdesi për shëndetin e syve tani mund të kontribuojë më shumë në mbrojtjen e tyre ndërsa plakeni.

Categories
Shëndeti

Pse disa njerëz nuk janë infektuar asnjëherë me Covid?

Mund të ndodhë që jo pak njerëz të njohin dikë që nuk është prekur me Covid, pavarësisht se të gjithë rreth tyre preken. Saktësisht se pse ndodh kjo mbetet mister, por shkencëtarët kanë filluar të gjejnë disa të dhëna.

Për momentin ekziston shpresa se identifikimi i këtyre mekanizmave mund të çojë në zhvillimin e barnave që jo vetëm i mbrojnë njerëzit nga prekja me Covid, por edhe i pengojnë ata që ta transmetojnë te të tjerët.

“Në studimet tona të mëparshme me viruse të tjera, ne kemi parë përgjigje të hershme imune në hundë që lidhen me rezistencën ndaj infeksionit,” tha për Guardian profesor Christopher Chiu në Imperial College London, i cili po udhëheq një studim në këtë fushë. “Së bashku, këto të dhëna nënkuptojnë se ekziston një garë midis virusit dhe pritësit, e cila te pjesëmarrësit tanë ‘të painfektuar’ rezulton në parandalimin e përhapjes së infeksionit.”

Disa prej tyre raportuan disa simptoma të buta, të tilla si hundë e bllokuar, lodhje, por edhe pse këto ndodhin zakonisht në jetën e përditshme, mund të mos kenë qenë të lidhura me ekspozimin ndaj virusit.

“Sido që të jetë, nivelet e virusit nuk u rritën aq sa të preknin nivelin e antitrupave, qelizave T ose faktorëve inflamatorë që zakonisht shoqërohen me simptoma,” tha Chiu.

Studime të tjera sugjerojnë gjithashtu se është e mundur që disa njerëz ta “bllokojnë” virusin gjatë fazave më të hershme të infeksionit, përpara se ai të krijojë një bazë të duhur për të shfaqur simptoma.

Ndoshta, qelizat T që lidhen me kujtesën për rastet e mëparshme të koronavirusit – dmth ato që janë përgjegjëse për ftohjet e zakonshme – reaguan me koronavirusin e ri dhe i mbrojtën këta njerëz nga Covid. Një pjesë e vogël e njerëzve madje mund të jenë gjenetikisht rezistentë ndaj Covid-19. Në tetor, një ekip ndërkombëtar studiuesish nisi një studim global për të gjetur disa prej tyre, me shpresën për të identifikuar gjenet mbrojtëse.

Categories
Shëndeti

Sugjerim nga Anila Kalleshi: Dieta me uthull molle bën mrekulli

Me siguri ke lexuar disa herë se uthulla e mollës është shumë e mirë për shëndetin. E konfirmoj me bindje të plotë si dietologe klinike: uthulla e mollës bën vërtet mrekulli.

Jo vetëm që të ndihmon në humbjen e peshës dhe ul ndjeshëm procesin e plakjes, por gjithashtu ul presionin e gjakut, përmirëson shëndetin e zemrës dhe lehtëson dhimbjet e stomakut.

Duke pasur parasysh të gjitha benefitet shëndetësore, konsumimi i rregullt i uthullës së mollës duhet të jetë kusht për të gjithë, por ka një problem: nuk ka shije shumë të mirë në të vërtetë.

Ka edhe për këtë një zgjidhje, për fat të mirë. Një recetë e thjeshtë që e bën uthullën e mollës të shijshme, në mënyrë që të marrësh prej saj të gjitha vlerat shëndetësore.

Kombino 2 lugë çaji uthull molle me lëng limoni, ujë dhe mjaltë. Lëngu i limonit është i shkëlqyer për hidratim, mjalti shton sasinë e duhur të ëmbëlsirës për të balancuar shijen e hidhur të uthullës.

Nise ditën çdo mëngjes me këtë lëng të shijshëm dhe shumë shpejt do të ndihesh e rinuar dhe vitale. Jua sugjeroj pa merak dhe mund të më shkruani për sugjerimet apo vërejtjet tuaja të mëtejshme.

Categories
Shëndeti

Mbretëresha e Anglisë ka një mënyrë unike për të ngrënë bananen

Mbretëresha e Anglisë, Elizabeth, ka një mënyrë të sajën për të ngrënë bananen, një metodë disi të çuditshme, por elegante sidoqoftë dhe të pakontestueshme gjithsesi.

Ish-kuzhinieri i familjes mbretërore, Darren McGrady, foli për zakonet e çuditshme të të ngrënit të Madhërisë së Saj në një bisedë me Marie Clare.

Mbretëresha Elizabeth ka një mënyrë unike, por jo se e ka shpikur vetë. Eshtë thjesht një mënyrë për të mos u treguar vulgare në publik.

Ndryshe nga ne të tjerët, mbretëresha refuzon ta qërojë dhe ta hajë një banane me duar. Në vend të kësaj, përdor një thikë dhe pirun, në mënyrë që të mos shihet duke gëlltitur ushqimin “si një majmun”, thotë ai.

McGrady e zbuloi këtë fakt në librin e tij, “Eating Royally”, ku shpjegoi se ajo pret pjesën e sipërme dhe të poshtme të bananes përpara se ta presë lëkurën gjatë. Më pas, e pret frutin në copa të vogla dhe i ha me pirun.

Po ju, si e hani bananen? Pyesim se si veproni në publik, për shembull në një restorant shik apo në një vend me njerëz të rëndësishëm. A ndiheni rehat kur hani banane?